काठमाडौं, २९ भदौ ।
आज हरितालिका तीज । बिहान उज्यालो नहुँदैदेखि पशुपतिनाथ मन्दिर क्षेत्रमा रातो सारीमा सजिएका महिलाहरूको ठूलो भीड लागेको छ । वर्षमा एक पटक आउने यो पर्वलाई सुरक्षित र व्यवस्थित बनाउन प्रशासनले सबै तयारी पूरा गरेको छ ।
तीज हिन्दु महिलाहरूले मनाउने पवित्र पर्व हो । भगवान शिव र पार्वतीको मिलनको प्रतीकको रूपमा यसलाई लिइन्छ । यस दिन विवाहित महिलाले श्रीमानको लामो आयुको कामना गर्दै व्रत बस्छन् भने अविवाहित युवती असल जीवनसाथीको कामना गर्छन् । त्यसैले तीजको मुख्य आकर्षण पशुपतिनाथ मन्दिर नै बन्ने गरेको छ ।
पर्वमा कुनै कमी कमजोरी हुन नदिन पशुपति क्षेत्र विकास कोषले एक साताअघि देखि नै तयारी थालेको थियो । कोषले सुरक्षा, दर्शन व्यवस्थापन, स्वास्थ्य र सरसफाइका लागि छुट्टा-छुट्टै उपसमिति बनाएर काम गरेको छ । नेपाल प्रहरी, सशस्त्र प्रहरी र काठमाडौं महानगर प्रहरीको संयुक्त कमाण्ड पोस्ट मन्दिर परिसरमै राखिएको छ ।
सुरक्षा व्यवस्थालाई मुख्य प्राथमिकतामा राखिएको छ । जिल्ला प्रहरी परिसर काठमाडौंका अनुसार दुई सिफ्टमा गरेर २५ सय भन्दा बढी प्रहरी खटाइएको छ । सशस्त्र प्रहरीका ८ सय जना बिहान २ बजेदेखि नै फिल्डमा छन् । भिडमा हुन सक्ने चोरी र पाकेटमारी रोक्न सादा पोसाकका प्रहरी, महिला प्रहरी, सीसीटीभी र ड्रोनबाट निगरानी भइरहेको छ ।
दर्शनलाई सहज बनाउन आज बिहान सवा ३ बजेदेखि नै मन्दिरका चारै ढोका खोलिएको छ । बाहिर ५ वटा लामो लाइन र भित्र ८ वटा सानो लाइनको व्यवस्था छ । बिहान ७ बजेसम्म ९ हजार भन्दा बढीले दर्शन गरिसकेका छन् ।
भक्तजनका लागि भण्डारखाल, सिफल चौर, तिलगंगा र बनकालीमा पार्किङ, खानेपानी ट्यांकर, स्वास्थ्य शिविर र बागमती किनारमा उद्धार टोली तयारी अवस्थामा राखिएको छ । कोषले मन्दिरभित्र फोटो खिच्न, मासु-मदिरा लैजान रोक लगाएको छ र विशेष पासको व्यवस्था नभएको स्पष्ट पारेको छ ।
प्रहरीले सबै भक्तजनलाई गरगहना नलगाउन, साना बच्चा साथमा नल्याउन र कुनै समस्या परे नजिकैको हेल्प डेस्कमा सम्पर्क गर्न आग्रह गरेको छ ।
प्रतिक्रिया
सम्बन्धित खबर
